Рүүммэйт гэрээ

Энэхүү нийтлэлийг нэлээд хэдэн жилийн өмнө Даяар Монгол сайтад зориулж бичиж нийтлүүлж байсан юм.

Эндхийн ихэнх Монголчууд рүүммэйттэй байж үзсэн байхаа. Хэдийгээр урьдчилж сайхан ярьж тохирсон ч зарим зүйл дээр маргаан үүсч хоорондоо таарч тохирсонгүй гээд салж нүүдэг. Зарим нь бүүр удаан хугацаагаар бие биендээ таагүй хандах нь бий. Үнэхээр хувь хүмүүс өөр өөрийн онцлог зан чанар, үзэл бодолтой тул таарахгүй байх нь аргагүй гэж бид бүхэн боддог. Тэгвэл сонгосон хүнтэйгээ цуг нүүж орох буюу нүүлгэж оруулахынхаа өмнө бүх л /боломжит/ асуудлыг урьдчилан тусгасан бичгээр гэрээ хийснээр эдгээр рүүммэйтүүдийн хооронд гарах зөрчилдөөнөөс зайлхийх боломжтой санагдана. Үнэхээр гарч болох асуудлыг шийдвэрлэх замыг нь гэрээндээ тусгачихвал тэр тэгсэн, энэ энгээгүй гэсэн маргаан, гомдол ихээхэн хасагдах нв лавтай. Энэхүү гэрээндээ бид ямар асуудлыг тусгавал зохилтой авч үзье.

1.Байр сууцныхаа хуваарилалтыг дэлгэрэнгүй тусгах
Хэн том, эсвэл аятайхан өрөөнд нь орох вэ, рэнтийн төлбөрөө яаж хувааж төлөх вэ, хувцасны шүүгээ, агуулах сав нөгөө хүнд хүрэлцээтэй эсэхийг тусгана. Түүнчлэн нийтийн эзэмшлийн хэсэг болох гал тогоо, ливин, банны өрөөгөө ямар байдлаар хэн тохижуулах, ямар хуваариар цэвэрлэгээг хийх, хэний нэр дээр дулаан, цахилгааны билл байх вэ, утас, интернэт ашиглалтандаа хуваарь гаргах шаардлагатай эсэх, төлбөрийг яг нягт нямбай /задгай мөнгий ч гэсэн/ хуваах зэргээ дэлгэрэнгүй тусгах. Ялангуяа утас, интернэтийн хэрэглээ ялигүй мэт сонсогдож байвч олон цагаар утсаар ярих, интернэтэд сууснаар нөгөө хүний авах ёстой байсан чухал дуудлаганд саад болсноор маргаан үүсдэг тохиолдол байдаг. Эдгээрээс нэлээд чухал нь хоол ундаа нийлэх үү, эсвэл тусдаа байх уу, хэрэв нийлж хэрэглэх бол хэдий хэмжээний мөнгөөр ямар төрлийн хүнс авч байх, хоолоо хэрхэн ямар хуваариар ээлжилж хийх зэргээ тохиролцох нь зөв юм.

2.Сурсан зах
Хэрэглэж заншсан хүнс хоол хүнснээс өгсүүлээд сонирхон сонсдог хөгжим хүртэл хоорондын харилцаанд ихээхэн нөлөөтэй. Хэрэв хөрөгчинд хатсан талх, онгойлгосон лааз зэрэг хөглөрөх, эсвэл нэгний тань гоо сайхны хэрэгсэл ванны өрөөний хамаг тавиурыг дүүргэсэн байвал нөгөө хүнд таалагдахгүй байж болно. Иймд нийтийн хэрэглээний өрөөнүүдэд өөрсдийн эзэмшлийн эд зүйлсээ хэрхэн байрлуулах, дуу хөгжмөө чанга сул сонсох гээд л өөрийн дадсан зан заншлынхаа талаар сайн муугаа ярилцаад, гэрээндээ заримыг нь тусгавал зохилтой.

3.Цагийн хуваарь
Рооммэйтүүд ажлын болон хичээлийн цагууд янз бүр байж болно. Иймд нөгөө хүнээ амарч унтах, хичээллэх үед чимээ шуугиан гаргахгүй байх зэргээр цагийн хуваариа зохицуулах шаардлагатай.

4.Хувь хүний амар амгалан байдал
Хонуутаар болон богино хугацаагаар ирэх зочдынхаа талаар бие биендээ урьдчилан мэдэгдэж зөвшөөрөл авах шаардлагатай.

5.Рентний гэрээгээ баримтлах
Рооммэйтүүд бүгд рэнтийн гэрээтэйгээ сайн танилцсан байх шаардлагатай бөгөөд гэрээнд тусгагдсан үүрэг хариуцлагыг бүгд баримтлах ёстой билээ.

6.Хэрэв салж нүүхээр шийдвэл
Мэдээж бүх харилцаа өөгүй байж чадахгүй ээ. Тэгвэл хэрэв ямар нэгэн маргаан үүсч рэнтийн гэрээ дуусахаас өмнө нүүхээр шйидвэл хэдэн өдрийн өмнө /30 өдөр/ мэдэгдэх, болон хэрэв байраа гэмтээж бохирдуулаагүй бол дипозитоо хэзээ хэрхэн авах зэргээ гэрээндээ тусгаарай.

Түүнчлэн та интернэтээр “sample roommate agreements” гэдгээр хайлт хийвэл америк рооммэйт гэрээний жишээ олдох ба тэдгээрээс санаа авч болох юм.